Бүгін медицина қызметкерлері күніне орай қала әкімшілігінде ақ халаттылар марапатталды. Осы атаулы күні адам жанының арашасы болған мамандарға арнайы құрмет көрсетіліп, еңбектері еленді. Қала әкімінің орынбасары Айбек Көпенов қызметкерлерді кәсіби мерекемен құттықтады. Облыс әкімі Оңдасын Оразалиннің, қалабасы Асхат Шахаровтың және басқа да мекемелердің атынан 50-ге тарта медицина саласының ең үздік қызметкерлеріне «Алғыс хаттар», сыйлықтар және гүл шоқтары тарту етілді. «Ақниет» кәсіподағының Ақтөбе облыстық филиалының төрайымы Лаура Жазықова денсаулығымыз сыр беріп, жанымыз қысылғанда көмек қолын созуға қашан да дайын тұратын дәрігерлерді әрдайым дәріптеуіміз қажеттігін айтты. Індет өршігенде тынбай жұмыс істеген ақ халатты абзал жандардың еңбегі ұмыт қалмады. Гиппократқа ант берген дәрігерлердің біліктілігі мен кәсібилігі әрқашан жоғары бағаланады.