"Локомотив" кинотеатрында бүгін "Қара жол" фильмінің премьерасы өтті. Кино жат діни ағымның жетегінде кеткен жігіттің өмірі туралы. Облыстық дін істері басқармасының тапсырысымен түсірілген туынды қала кинотеатрларында және аудандарда көрсетілмек. Жаңа фильмді алғаш болып студенттер, жастар, қала тұрғындары көрді. Фильмді Ақтөбе облыстық дін істері басқармасының тапсырысымен Шымкенттің "Синема групп" студиясы түсірген. "Аңсар" ақпараттық-талдау орталығы 6 миллион теңге бөлді. Хронометражы - 1 сағат 10 минут. Былтыр "Есігіңді қаққан кім?" спектаклі көрермендер арасында жоғары сұранысқа ие болған соң, теологтар жастарға ой салатын кино түсіруге шешім қабылдаған. Басқармадағылар Ахтанов атындағы облыстық драма театрымен бірге тағы бір қойылым әзірлеп жатыр. Ақтөбе облысында қазір теріс діни ағымды ұстанатын 2 мыңға жуық адам бар. Теологтар жыл басынан бері 380 адамды дәстүрлі дінге қайтарған.