Жылдағы дәстүрмен 1-маусымда суға шомылу кезеңі ашылады. Облыстық төтенше жағдайлар департаменті қызметкерлері қазір жағажайлардың қауіпсіздігін тексеріп жатыр. Суда құтқарушылар да дайындық үстінде. Ақылы жағажайларға барудан гөрі тегін алаңдарда шомылатындар арасында қайғылы оқиғалар жиі орын алады. Осындай жағдайларды ескере отырып, биыл қалада қызметі тегін жағажай ашылатын болды. Қонаев көшесі мен Нокин даңғылының қиылысындағы Елек өзенінің бойында енді қалалықтар тегін шомыла алады. Ол жерлерде арнайы құтқарушылар кезекпен жұмыс істейді. Коммуналдық жағажайда қалалықтардың еркін демалуына барлық жағдай жасалған.Сондай-ақ, қалада биыл бірнеше жаңа ақылы жағажайлар ашылатын болды. Облыс бойынша барлық жағажайларда қызмет атқаратын 88 құтқарушы арнайы әзірліктен өтіп, маусымдық жұмысқа дайын. Жыл бойы мектеп оқушыларына шомылу ережелері туралы түсіндірме жұмыстары жүргізілген.Барлық су қоймалары мен шомылу алаңдарын аралап, тексеріп шыққан мамандар облыс аумағындағы су айдындарында 200- ден астам қауіпті жерлер барын айтады. Құтқарушылар сараптама жүргізе келе қайғылы жағдайлар көбіне маусым басталғандағы алғашқы күндері орын алады, дейді. Өйткені күн бірден ысып кеткенімен, су температурасы төмен болады. Өткен жылы облыс аумағында 23 адам суға кеткен. Олардың төртеуі бала.