Бүгін Әуеқалашығы ауданындағы көпқабатты үйдің тұрғындары бірнеше айдан бері жылу дұрыс берілмей, қыс мезгілінде пәтерлерінде жаурап отырғандарын айтып шағымданды. Әуеқалашығындағы №30 "А" үйде шамамен 60 пәтер бар. Тұрғындар жертөледегі құбырлардың өте жақсы жағдайда екенін айтты. Тек былтыр ауданның орталық жылыту қазандығы жергілікті су мен жылуға жауапты жалғыз мекеменің балансына берілгелі күйі кете бастады деп шығынды. Әуеқалашығы ауданында орналасқан №30 "А" үйдің тұрғыны Рысгүл Жексенбиева қалада жылу маусымы былтыр қазан айында басталғанымен, пәтеріне жылу жөнді келмегенін айтады. Сол уақыттан бері тиісті мекемелерге барған, әкімдікке де хабарласқан. Бірақ еш нәтиже жоқ. Рысгүл Жексенбиеваның сөзін көршілері де растады. Күндіз-түні тоқ пеш пен газ жағып отырмыз. Cонда да суық, жаурап жүрміз. Балаларды да шомылдыра алмаймыз, - дейді көпқабатты үй тұрғындары. Қыс мезгілінде қажетті жылу берілмегендіктен 9 қабатты үйдің пәтерлері сыз тарта бастаған. Жылу батереялары қан жылым. Тұрғындардың арызы бойынша «Aqtobe su-energy group» АҚ-на хабарласқанымызда мынадай жауап алдық. Мекеме өкілінің берген мәліметіне сәйкес, тұрғындардан түскен арызға байланысты жалғыз бұл көпқабатты үй емес бүтін ауданның орталық жылыту жүйесіне жөндеу жұмыстары жүргізілген. Аудандағы шамамен тоғыз көпқабатты үйге жылу таратуы тиіс екі үлкен қазандық бірнеше сағат бойы толықтай жөндеуден өткен. Үйлерге жылу сәйкесінше ауа температурасына байланысты жіберіліп тұр.