Ғаламтор жұлдызына айналған волейболшы қыз Сабина Алтынбекова Ақтөбеде. Сабина Алтынбекованың аты Тайбэйдегі Азия чемпионатынан кейін шықты. Осы ойында ол бәрінің көзіне асқан сұлулығымен түскен еді. Спорт үшін бұл қыз тым сұлу дегендер де табылды. Ғаламторды шулатқан Сабина бүгін өзінің туған қаласына келді. Апасының тойына келген қыз өзі бірінші болып ойнаған волейбол командасының  құрамымен кездесуге уақыт тапты. Тайбэйдегі Азия чемпионатында Қазақстан құрамасы 15 команданың ішінде 7-ші орынға ие болды. Алайда Сабина Алтынбекова аталмыш чемпионаттың ең өзекті тақырыбына айналды. Оның келбетін жапон анимациялық фильмдеріндегі сұлу қыздармен салыстырды. Бүгінде  танымал әлеуметтік желілерде Сабинаға қызығушылық танытқандардың саны 300 мыңнан асады. Сабина 1996 жылы дүниеге келген. Қаладағы №9-шы гимназияда білім алды. Биыл ұлттық бірыңғай тестілеуден 88 балл жинап, Әл-Фараби атындағы Қазақ Ұлттық Университетінің дене шынықтыру факультетіне түсті. Қазір Сабина алматылық "Алмантиночка" командасында ойнайды. Желтоқсан айында Сабинаны командасымен бірге Гонконг қаласына жолдастық кездесу өткізуге шақырған. Бұл ұсыныс жайында олар әлі шешім қабылдаған жоқ. Сондай-ақ, Сабина сән әлеміне кетіп қалуы ықтимал деген қауесет те тараған еді. Алайда Сабина бүгінгі кездесуде  "Мен спортқа биік шыңдарды бағындыруға келдім. Спорттан кетер ойым жоқ" деді.