Камуфляжды кез-келген адам кие алады. Тек әскери салаға қатысы бар белгілері болмауы керек. Ал елдің қорғаныс министрлігі әскери киім киюге тыйым салынғанын жоққа шығарды. Қала тұрғындары камуфляжды күнделікті тұрмыста кию ыңғайлы екенін айтты.Бұған дейін белгілі болғандай, әскери полиция өкілі камуфляж формасын киюге тыйым салынған деп мәлімдеп, тіпті айыппұл көлемін де көрсеткен еді. Ал енді министрлік әскери киім киюге тыйым салынғанын ресми түрде жоққа шығарды. Яғни, камуфляж костюмдерінде қарулы күштерге тиесілі погон, шеврон болмаса, ол азаматтық киім болып есептеледі. Десек те, қала тұрғындарының арасында күнделікті киіп жүрген форманы мәжбүрлі түрде шешкендер де бар. Әскери салаға қатысы жоқ адам камуфляж кигенде нені ескеруі қажет? Формада ең бастысы Қарулы күштерге, өзге де әскери құрамаларға тиесілі белгілері, погондар, жолақтар болмауы керек. Еш белгісі жоқ камуфляж костюмдері әскери киім болып саналмайды. Сондықтан қарапайым азаматтарға киюге тыйым салынбаған. Десек те, әскери форманың белгілері, нышаны бар киімдерді заңсыз кигендер айыппұлдан қашып құтылмайды. Бұл жағдайда жеке адамдарға 14 мың теңге көлемінде айыппұл салынады.