Полиция кез келген тұрғынмен қоян-қолтық жұмыс жасауға мүдделі. Бүгін жергілікті полиция департаментінің инспекторлары "Трансэнерго" АҚ-ның қызметкерлерін тәртіп сақшыларымен бірге жұмыс істеуге шақырды. Жұмысшыларға қоғамдық тәртіпті бұзған жағдайда қандай жазаға тартылатыны түсіндірілді. Өңірде жыл басынан бері қарапайым тұрғындардан құрылған қоғамдық ұйымға 3 мыңға жуық адам мүше. Олардың көпшілігі ірі мекеме қызметкерлері. Осы ұйым мүшелерінің көмегімен түнде рейдтік шаралар өткізіледі. Өткен 10 айда тұрғындардың көмегімен 25 қылмыстың жолы кесілген. 400-ге жуық әкімшілік істі ашуға қарапайым тұрғындар көмектескен. Мұндай деректерді ірі монополист мекеменің қызметкерлеріне жеткізген тәртіп сақшылары оларды бірлесе жұмыс істеуге шақырды. Мұндай облыс бойынша 369 қоғамдық ұйым бар. Ірі департамент пен жеке мекемелер қызметкерлері мүшелікке алынған. Рейдтерге белсенді атсалысқан әрі жақсы жұмыс атқарған тұлғаларға 10 айлық есептік көрсеткіш көлемінде сыйақы тағайындалады. Биылдың өзінде 100-ден аса ақтөбелік 25 мың теңгеден сыйақы алған. Қоғамдық ұйымдардың тек бір ғана жұмысы жолға қойылмаған. Ұйымның шартында жеке тұлғаның айына қанша рет рейдтік шараларға шығуы тиіс екені нақтыланбаған. Мүшелікке өткенмен бірде бір рет төбе көрсетпеген тұлғалар да кездеседі. Қоғамдық істе саннан сапа жоғары бағаланады. Сондықтан полицейлер қоғамдық ұйымдардың мүшелері қоғамдық тәртіп жұмыстарына бей-жай қарамай белсенділік танытса деген пікірде. Қоғамдық тәртіп тек түнде емес кез келген сәтте бұзылуы мүмкін.