Елдегі әйел кәсіпкерлерді қолдау мақсатында жыл соңына дейін 1 миллиард теңге несие бөлініп отыр. Әр қыз-келіншек бизнес жобасын жүзеге асыруға немесе кәсібін кеңейтуге Қазақстан халық банкі арқылы 10 миллион теңгеге дейін жеңілдетілген несие ала алады. Бірақ, қаржыға қол жеткізудің өзіндік талап-шарттары бар. Мәселен Ақтөбеден жақсы жобалар шығып жатса, 1 миллиард теңгенің басым бөлігін тартуға болады. Несие зейнет жасына дейінгі әйел кәсіпкерлерге беріледі. Ал зейнет жасына жақындап қалғандары болса да, оларға берілетін несие көлемі де шектеледі. Банк кепіл сұрайды. Кепілзат болмаған жағдайда "Даму " қорының арнайы бағдарламалары арқылы несиеге өтініш бере алады. Сондай-ақ, бизнес жоба ұсынушы ЖШС құрылтайшысы болса, ол компанияның 50 пайыздан артық акциясының иесі болуы керек. Несие қолма қол ақшамен берілмейді және 100 пайыз игерілуі міндеттеліп, бақыланады. Іскер әйелдерді қолдау қоры бағдарламаға әсіресе, ауылдағы қыз-келіншектерді тартуды көздейді.