Гришин көшесіндегі №72 үйдің тұрғындары шағымдарын тыңдар жанды іздеумен әлек. Көп қабатты үйдің кіреберісінде 15 күннен бері жарық жоқ. Тұрғындар әсіресе балалары үшін алаңдайды. . Электр энергиясын неге сөндіргенін ешкім ашып айтпайды. Алдын ала ешқандай ескерту де жасалған да жоқ,- дейді тұрғындар. "Туған жер" пәтер иелері кооперативінің төрағасы осы уақыт аралығында бұл үйге ат ізін салмаған. Кооператив жұмысына тұрғындардың көңілі толмайды. Осы уақытқа дейін олар сұрақтарына жауап алуға барған, бірақ, ешкімді орнынан таппапты. Ай сайын қыруар қаржы төлейміз, бірақ, үйдегі ортақ проблемалар шешілер емес дейді тұрғындар. Жылу, тазалық мәселелерін тұрғындар өздері шешіп келген. Енді тым болмаса жарықты қалпына келтіруді талап етіп отыр. Бұл мәселенің анық қанығына жету үшін "Туған жер" пәтер иелері кооперативіне бардық. Бірақ, біз де жауап беретін адамды орнынан таппадық. Өзге қызметкерлер сұрағымызға жауап бермей ат тонын ала қашты. "Туған жер" ПИК заңсыз электр энергиясы бойынша келісім шартты бұзған. Осы уақыт аралығында тұрғындарға ешқандай есеп бермеген. Қалалық тұрғын үй инспекциясы бөлімі бұл жағдайдан хабардар болып шықты. Олар тұрғындармен екі рет жиналыс өткізген. Мәселені шешеміз деп отыр. Даулы мәселенің нүктесі ертең қойылады. Әкімшілік тұрғындарды ертең кешкі сағат алтыда №6 мектепке жинамақшы. "Туған жер" ПИК өкілдері де келіп халық алдында заңды түрде есеп беретін болады. Және жақын маңдағы ПИК шақырып, өз тарифтерін көрсетіп, ұсыныстарымен бөліседі. Тұрғындардың қалауы бойынша келісім-шарт жасалып, көп ұзамай жарық беріледі деп отыр мамандар.