Ақтөбенің біраз жылдардан бері ескіріп тұрған спорт нысандары толыққанды жөндеуден өтпек. Ол үшін қазынадан сұралған қаражат кешіктірілмей бөлінеді. Бүгін өңір басшысы Оңдасын Оразалин шаһарда жөнделіп жатқан әлеуметтік маңызы бар нысандарды аралап көрді. Қолданылып жатқан құрылыс материалдарының сапасын қарады. Болашақ ауданындағы жол құрылысы, Есет батыр көшесіндегі аулаларды абаттандыру жұмысының барысымен танысты. Заречный ауданына барар жолда бой көтерген бұл спорт кешені 500 млн теңгеге салынған. Екі қабатты спорт нысанында әзірге жасөспірімдер ақылы жаттығып жүр. Баскетбол, хоккей ойнап, футбол алаңдарында доп тебеді. Нысанның едені соңғы үлгіде төселген. 60 млн қаражатқа жасалған еден құлаған баланың тізесін жарақаттамайды. "Келешек" спорт кешені әлі үлкейтіліп жатыр. Болашақта бұл жерде Қарғалы ауданына қарасты барлық тұрғын үй алаптарының балалары келіп жаттығатын болады. Ол үшін мемлекеттен қаражат бөлініп, тегін үйірмелер ашылмақ.
Жаңа оқу жылына №11 жалпы білім беретін орта мектебі сақадай сай. 84 жылдық тарихы бар ескі ғимарат 100 млн теңгеге ағымдағы жөндеуден өткен. 1300 оқушы білім алатын мектептің есік, терезелері ауыстырылып, шатыры жөнделді. Әуеқалашығы ауданында жылыту қазандығы жаңғыртылған. Сонау 1974 жылы салынған қазандық 83 нысанға жылу таратып отыр. Оның ішінде Ә. Молдағұлова атындағы халықаралық әуежай да бар. Жылу тарату қуаты жоғарылаған қазандық биылғы жылыту маусымында 43 көп қабатты үйге қызмет көрсетпек. Қосымша 30-дан аса әлеуметтік нысан бар. Келер жылы жарты ғасырлық тарихы бар Қобыланды батыр атындағы орталық стадион күрделі жөндеуден өтеді. Жөндеу жұмыстары ұзаққа жалғасуы мүмкін. Бұл аралықта спортшылар жаттығудан қол үзіп қалмас үшін №8 балалар және жасөспірімдер спорт мектебінің футбол алаңында шынығады. Спорт мектебінде қазір күрделі жөндеу жұмыстары жүргізілуде. Шаһарда жол жөндеу жұмыстары қарқынды жүргізіліп жатыр. Болашақ ауданында Шәкәрім Құдайбердиев, Халел Досмұхамбетұлы көшелері ағымдағы жөндеуден өтуде. Ал, 5-ші мөлтек аудан, Есет батыр, Тургенев көшелеріндегі көп қабатты үйлердің аулаларын абаттандыру жұмыстары қыркүйек айының ортасына дейін жалғаспақ. Жалпы қала бойынша 45 аула абаттандырылмақ. 300 млн теңге қаражатқа үш мердігер мекеме жөндеу жұмыстарын жүргізуде. Біраз әлеуметтік нысандардағы жөндеу жұмыстарын пысықтап шыққан өңір басшысы Оңдасын Оразалин жобаларды аяқтап, тапсыруды белгіленген мерзімнен кешіктірмеу жағын қарастыруды тапсырды. Мәселен, Болашақ ауданындағы жол жөндеу жұмыстары аумағында орта мектеп орналасқандықтан тамыз айының соңына дейін аяқталуы тиіс. Бұл талап мердігер компания өкіліне бүгін де ескертілді.