Кім кінәлі? "Ақтөбе Мыс компаниясында" болған жазатайым оқиғаны тексеру жұмыстары аяқталды. Сот-медициналық сараптама қорытындысы бойынша, жұмысшылар газға уланып, қаза тапқан. Арнайы комиссия жұмыс берушінің еңбек қауіпсіздігін және еңбекті қорғау қағидаларын бұзғанын анықтады. Сондай-ақ, жұмысшылар да қателікке жол берген. Бұл туралы бүгін өңірлік коммуникациялар қызметінде өткен брифингте айтылды. Жұмыс беруші ғана емес, жұмысшы да кінәлі. Арнайы комиссия қаза тапқандар еңбекті қорғау жөніндегі нұсқаулықты бұзды деген тұжырым жасады. Айтуынша, кеншілердің тірі қалуына мүмкіндік болған. Бас мемлекеттік еңбек инспекторы мәлімдегендей, қаза тапқан 4 жұмысшының үшеуінің кінәсі 10 пайыз. Ал оқиға орнында көз жұмған учаске шеберінің кінәсі 20 пайыз. Комиссия атап көрсеткендей, ол өзін және қоластындағы жұмысшыларды құтқармады, диспетчерге хабарламаған. Тексеру нәтижесінде еңбек заңнамасын бұзған жауапты адамдар да анықталды. Атап айтар болсақ, "Весенне-Аралчинское" кенішінің бас инженері жарылыс жұмыстары кезінде бас желдеткішті істен ажыратып тастаған. Ал желдету учаскесінің бастығы өзіне сеніп тапсырылған бөлімшенің қауіпсіздігін қамтамасыз етпеген. Жарылыс жұмыстары кезінде улы газ бөлінетінін білетін жауапты адамдар неге мұндай әрекетке барған? Жер астына ауа айдайтын желдеткіш неге тоқтатылған? Комиссия мүшелері қаза тапқандардың отбасымен, ағайындарымен кездесіп, ұсыныстарын тыңдады. Олардың туыстарының көбі мыс компаниясында еңбек етеді. Аталмыш мекеме марқұмдардың отбастарына жерлеу рәсімін өткізу үшін 2 миллион теңгеден төледі. Алдағы уақытта да материалдық көмек берілетін болады.Комиссия мүшелері қаза тапқандардың шахтаға түсуге рұқсаты болмаған, қауіпсіздік құрылғыларымен қамтамасыз етілмеген деген ақпаратты жоққа шығарды. Саламат Аманбаев комиссия құрамында компания қызметкері болғанын, ол барлық тексеру ісіне қатысқанын айтты.Еске сала кетейік, жазатайым оқиға Хромтау ауданындағы "Весенняя-Аралчинская" жерасты кенішінде 30- желтоқсан күні кешке жарылыс жұмыстарын орындау кезінде болды. Салдарынан "Ақтөбе мыс компаниясы" ЖШС қызметкерлері - тау-кен шебері Асхат Қайқанов, жарушылар Рустам Шәметов пен Денис Черный, жүргізуші Берік Жақыпов оқиға орнында қаза тапты. Сараптама қорытындысына сәйкес, кісі өліміне этиологиялық ағзаның қатты улануы себеп болған.